'ફ્યુચર પાર્ટનર્સ' અનુસાર, યુ.એસ.ના મુસાફરો આર્થિક મંદી અંગે વધુ ચિંતિત છે, તેમ છતાં પ્રવાસન પ્રવૃત્તિ ગયા વર્ષના સ્તર કરતાં વધુ જળવાઈ રહી છે. વધુ મુસાફરો અચાનક ટ્રિપ્સ યોજી રહ્યા છે અને પ્રવાસના સંશોધન તથા પ્લાનિંગ માટે AI (આર્ટિફિશિયલ ઇન્ટેલિજન્સ) અને સોશિયલ મીડિયાનો ઉપયોગ કરી રહ્યા છે.
ફ્યુચર પાર્ટનર્સના “ધી સ્ટેટ ઓફ ધી અમેરિકન ટ્રાવેલર ઇન સપ્ટેમ્બર 2026” રિપોર્ટમાં જાણવા મળ્યું છે કે 46.6 ટકા યુ.એસ. મુસાફરોને છ મહિનાની અંદર મંદી આવવાની ધારણા હતી, જે ઓગસ્ટમાં 43.8 ટકા હતી. છતાં 57.5 ટકા લોકોએ છેલ્લા એક મહિનામાં રાત્રિ રોકાણ સાથેની લેઝર (મનોરંજન) ટ્રિપ કરી હતી, જે એક વર્ષ અગાઉ 50.8 ટકા હતી.
આર્થિક આત્મવિશ્વાસ સતત બીજા મહિને ઘટ્યો હતો. જે મુસાફરો એવું માનતા હતા કે તેમના પરિવારની સ્થિતિ એક વર્ષ અગાઉ કરતાં સારી છે, તેમનો હિસ્સો ઓગસ્ટના 34.0 ટકાથી ઘટીને 32.8 ટકા થયો હતો, જ્યારે 52.3 ટકા લોકો મંદીની ચિંતાઓને કારણે તેમના ખર્ચ પર નજર રાખી રહ્યા હતા, જે ઓગસ્ટમાં 50.6 ટકા અને એક વર્ષ અગાઉ 46.4 ટકા હતો.
બજેટમાં સુધારો થયો હોવા છતાં ખર્ચના સૂચકાંકો સ્થિર રહ્યા હતા. સરેરાશ વાર્ષિક પ્રવાસ બજેટ ઓગસ્ટના $5,340 થી વધીને $5,697 થયું હતું, પરંતુ તે એક વર્ષ અગાઉના $6,184 કરતાં નીચું રહ્યું હતું. ઓછામાં ઓછું $200,000 કમાતા મુસાફરોએ $14,068 નુ બજેટ રાખ્યું હતું, જેની સરખામણીએ $49,000 થી ઓછી કમાણી કરનારાઓ માટે આ બજેટ $2,164 હતું.
નાણાકીય ચિંતાઓ છતાં, 57.3 ટકા લોકોએ આર્થિક મંદી દરમિયાન પ્રવાસને એક યોગ્ય રોકાણ ગણાવ્યું હતું, જે એક વર્ષ અગાઉ 55.9 ટકા હતું. લગભગ 32.0 ટકા લોકો આગામી 12 મહિનામાં પ્રવાસ ખર્ચ વધારવાની અપેક્ષા રાખતા હતા, જ્યારે 18.2 ટકા લોકો ઓછો ખર્ચ કરવાની અપેક્ષા રાખતા હતા.
ટ્રાવેલ પ્લાન્સમાં પણ વધારો થયો છે. મુસાફરો આગામી 12 મહિનામાં સરેરાશ 3.8 ટ્રિપ્સ કરવાની અપેક્ષા રાખતા હતા, જે ઓગસ્ટમાં 3.6 હતી, જ્યારે એક પણ ટ્રિપનું પ્લાનિંગ ન ધરાવતા લોકોનો હિસ્સો
16.2 ટકાથી ઘટીને 14.6 ટકા થયો હતો. $49,000 થી ઓછી કમાણી કરનારાઓમાં 22.9 ટકા લોકો પાસે કોઈ ટ્રિપ શેડ્યૂલ નહોતી, જેની સરખામણીએ ઓછામાં ઓછું $200,000 કમાનારાઓમાં આ પ્રમાણ 7.3 ટકા હતું.
અચાનક (સ્પોન્ટેનિયસ) ટ્રિપ્સનું પ્રમાણ અભ્યાસમાં સર્વોચ્ચ સ્તરે પહોંચ્યું હતું. લગભગ 25.2 ટકા લોકોએ જણાવ્યું હતું કે તેઓ વારંવાર અથવા ખૂબ જ વારંવાર અચાનક લેઝર ટ્રિપ્સ લે છે, જે એક વર્ષ અગાઉ 17.6 ટકા હતું. આમાં જેન ઝી (Gen Z) 43.6 ટકા સાથે મોખરે રહ્યું, ત્યારબાદ ઓછામાં ઓછું $200,000 કમાતા મુસાફરો 36.8 ટકા અને શાળાએ જતા બાળકોના માતાપિતા 36.6 ટકા સાથે જોડાયા.
ટ્રિપ પ્લાનિંગમાં AI નો ઉપયોગ એક વર્ષ અગાઉના 22.6 ટકાથી વધીને 31.9 ટકા થયો છે. એક અલગ સર્વેમાં, 55.1 ટકા લોકોએ પ્રવાસના પ્લાનિંગ માટે AI ટૂલ અથવા ચેટબોટનો ઉપયોગ કર્યો હતો, જેમાં 39.1 ટકા લોકોએ ChatGPT અને 30.3 ટકા લોકોએ Google Gemini નો ઉપયોગ કર્યો હતો.
પ્રવાસના સંશોધન માટે સોશિયલ મીડિયાનો ઉપયોગ પણ વધ્યો છે. YouTube 35.9 ટકા સાથે સૌથી આગળ રહ્યું, ત્યારબાદ Facebook 33.8 ટકા, Instagram 27.3 ટકા અને TikTok 20.6 ટકા પર રહ્યું. તેમ છતાં, 65 ટકા લોકોને AI ટૂલ કરતાં કોઈ વ્યક્તિ પાસેથી સ્થાનિક પ્રવાસની સલાહ મેળવવામાં વધુ વિશ્વાસ હતો.
વધારાના પ્રવાસ માટે ખર્ચ એ મુખ્ય અવરોધ બની રહ્યો. લગભગ 36.4 ટકા લોકોએ જણાવ્યું કે પ્રવાસ ખૂબ જ મોંઘો હતો, જ્યારે 31 ટકા લોકોએ પેટ્રોલો-ડીઝલ (ગેસ) ના ભાવોને કારણ દર્શાવ્યું, જે એક વર્ષ અગાઉ 16.8 ટકા હતું. પ્રવાસ માટે 'બાય-નાઉ-પે-લેટર' (હમણાં ખરીદો, પછી ચૂકવો) નો ઉપયોગ ઓગસ્ટના 15.4 ટકાથી વધીને 16.8 ટકા થયો છે.
બિઝનેસ મુસાફરો મુસાફરી દરમિયાન પોતાના અલગ દબાણોનો સામનો કરે છે. તાજેતરના 'હયાત હોટેલ્સ કોર્પ.' ના રિપોર્ટમાં જાણવા મળ્યું છે કે લગભગ 90 ટકા લોકો કામની ટ્રિપ દરમિયાન તેમની હોટેલના રૂમને જ એવી એકમાત્ર જગ્યા માને છે જ્યાં તેઓ કામના તણાવથી મુક્ત (ઓફ ધ ક્લોક) અનુભવે છે.
